سؤال سألته نفسى لىّ ....و دورت على اجابته فى عيون اللى حواليا
انا مين......انا مين؟؟؟
انا اللى جوايا حب يملى الكون....و ابو قلب طيب و رقيق و حنون
ولا انا من اللى بيقولوا على الحب جنون....و احذر قلبى دايما و اقوله
اوعاك في يوم تكون عاشق او مفتون
انا اللى بأرادتى اعدى جبال و سدود....و اقدر امشى و اجرى اوصل لابعد الحدود
ولا انا اللى سور ارادتى دايما مهدود....و الايد اللى تتمد تقومنى ابعدها
اصل انا صاحب تفكير محدود
انا اللى بأختار طريقى و اخد القرار....و لما ابدأ فى الطريق اكمله لنهاية المشوار
ولا انا ماشى فى طريقى مش شايف و بدون اختيار....و احاول اقنع نفسى و افهمها
صدقينى مش فارق ليل من نهار
انا اللى بعيونى اشوف الكل جميل و لطيف....و الحمل التقيل فوق كتافى اقول عليه دا خفيف
ولا انا عيونى بتشوف الربيع اسوأ خريف....و ابص للكل و مش عاجبنى
و كلام الغير بالنسبه لى تخريف
انا اللى اقدر اساعد الكل من حواليا .... و ابّدى غيرى على نفسى و اقول خليها علىّ
ولا انا اللى اهتم بنفسي و تبقى لها الاولوية .... و ان طلب حد منى خدمة
يبقى الموضوع عندى مالوش اهمية
و هتلاقى كتير اوى من الحوارات.... منها المستقبل و الحاضر و اللى فات
و وقفت قدام كتير من المرايات.... و سألت بعلو الصوت انا مين
و من كتر الندا صوتى مات
و من كتر الاختلافات نسيت انى انسان....و كتر التفكير اصبح الفكر تعبان
اصل الانسان كان مخلوق برقة و حنان....و لا كان يعرف اللى اسمه الشر
و لا كان غير الخير اللى يبان
و جه اليوم اللى خد فيه الانسان القرار.... و على معرفة الشر وقع الاختيار
و طبعا مابقتش تنفع الجنة دار ....و الشر بقى جنب الخير يبات
و عجبى من اللى حصل و اللى صار
و عمّال تسأل و عامل نفسك محتار....و نسيت ان انت ليك حق الاختيار
قدامك الخير و الشر و ليك القرار....و بدل ما تسأل انا مين
قوم اختار و ابدأ المشوار
انت اللى هتختار هتكون مين .... و باختيارك هتصنع مكانك وسط الملايين
و يوم ما تبقى سعيد بأختيارك و مش حزين ...ساعتها بس هيختفى السؤال اللى بيقول
انا مين.........؟؟؟؟؟؟؟؟؟؟؟
.................................................................
تاليف.. ابرام عماد
0 التعليقات:
إرسال تعليق